2026 წლის მსოფლიო ჩემპიონატის ფინანსური შედეგები
You're reading Entrepreneur Georgia, an international franchise of Entrepreneur Media.
რა თანხა გამოიმუშავა 2026 წლის მსოფლიო ჩემპიონატმა? Bank of America-ს გათვლებით, საუბარია დაახლოებით 40 მილიარდ დოლარზე, საიდანაც შემოსავლის ნახევარი მხოლოდ შეერთებულ შტატებზე მოდის.
Bloomberg-ის ცნობით, განსაკუთრებით სოლიდური წილი ნიუ-იორკსა და ნიუ-ჯერსის ერგოთ – შტატებს, რომლებმაც ესპანეთსა და არგენტინას შორის გამართულ გადამწყვეტ ფინალურ მატჩს უმასპინძლეს.
ჩატარებულმა კვლევამ აჩვენა, რომ მხოლოდ ჯგუფურმა ეტაპმა რეგიონის ეკონომიკას 1,2 მილიარდი დოლარის პირდაპირი მოგება მოუტანა. არგენტინა-ესპანეთის ფინალის დროს, გადამყიდველების მიერ გადაყიდული ბილეთების საშუალო ფასმა 12 500 დოლარს მიაღწია, რაც საგრძნობლად აღემატება ბოლო წლების Super Bowl-ის ამავე მაჩვენებლებს.
ასევე აღსანიშნავია, რომ ბრაზილიისა და მაროკოს გახსნითმა შეხვედრამ MetLife Stadium-ზე, საკვებისა და სასმლის გაყიდვების მხრივ რეკორდულ მაჩვენებელს მიაღწია და სპორტულ მოვლენებს შორის ყველაზე მაღალი შემოსავალი მოიტანა 2014 წლის Super Bowl-ის შემდეგ.
ტურნირის ოფიციალური სამარშრუტო ტრანსპორტი კი, რომლის ბილეთის ფასიც 20 დოლარი იყო, 69 000-ზე მეტ მგზავრს მოემსახურა და მიღებული შემოსავლის მაჩვენებელმა ჯამში 1,4 მილიონ დოლარს მიაღწია.
FIFA-მ შეძლო, რომ ფინანსური მოგება მხოლოდ ბილეთებისა და მაისურების გაყიდვით არ შემოფარგლულიყო. ორგანიზაციამ MetLife Stadium-ის ბუნებრივი გაზონის ნაჭრებიც კი სამახსოვრო სუვენირად აქცია და თითო 450 დოლარად გაყიდა. ამას დაემატა 3000-დოლარიანი ბროლის თასის ასლები.
თუმცა, FIFA-ს ამ ფინანსურ ტრიუმფს ყველა ადგილობრივი ოფიციალური პირი აღფრთოვანებით არ შეხვედრია. ნიუ-ჯერსის შტატის წარმომადგენელმა, მაიკლ ინგანამორტმა, ორგანიზაცია გააკრიტიკა იმის გამო, რომ მან მოგება უშუალოდ რეგიონის კუთვნილი სტადიონის საფრის ფრაგმენტების გაყიდვით იშოვა:
"FIFA-მ პირდაპირი გაგებით უნდა აიღოს ხელი ჩვენს გაზონზე და დატოვოს ჩვენი ტერიტორია!" – განაცხადა მან.
აღსანიშნავია, რომ მსოფლიო ჩემპიონატის მსვლელობისას განსაკუთრებით აქტიური იყო ტურიზმისა და მასპინძლობის სექტორი. ფინალისა და ჯგუფური ეტაპის დღეებში, ნიუ-იორკისა და ნიუ-ჯერსის სასტუმროებსა თუ Airbnb-ზე არსებული უპრეცედენტო მოთხოვნის გამო, ფასები უმეტეს შემთხვევაში 300-400%-ით გაიზარდა. საგრძნობლად მოიმატა ადგილობრივი რესტორნების, ბარებისა და ფანზონების შემოსავლებმაც, სადაც მილიონობით გულშემატკივარი იკრიბებოდა.
